இன்று திருமணம் மறுநாள் தற்கொலை! காரணம் என்ன?

சமீப காலங்களில் தற்கொலைகளின் (Suicide) எண்ணிக்கை அதிகரித்துகொண்டு வருவது அனைவரையும் கவலையில் ஆழ்த்தியுள்ளது. சிறு தோல்விகளையும் ஏமாற்றங்களையும் கூட தாங்கிக்கொள்ள முடியாத அளவிற்கு மனித மனம் நலிந்து விட்டதா என்ற கேள்வி எழுகிறது. உத்திர பிரதேசத்திலிருந்து வந்துள்ள ஒரு செய்தி இது குறித்த அச்சத்தை அதிகரிப்பதோடு பல கேள்விகளையும் எழுப்புகிறது.

உத்திரபிரதேசத்தின் (UP) முஸஃபர்நகரிலிருந்து (Muzafarnagar) அதிர்ச்சியளிக்கும் செய்தி ஒன்று வெளி வந்துள்ளது. இங்கு ஜூன் 29 அன்று, சச்சின் மற்றும் நேஹாவின் திருமணம் நடந்தது. திருமணத்திற்குப் பிறகு மணமகன் வீட்டிற்கு வந்த மணப்பெண் அடுத்த நாளே தூக்கிலிட்டு தற்கொலை செய்துகொண்டார். இந்த செய்தி அந்தப் பகுதி முழுவதும் தீ போல் பரவி பரபரப்பை ஏற்படுத்தியது. பெண்ணின் அறையில் இருந்த கண்ணாடியில் தற்கொலைக்கான குறிப்பு ஒன்றையும் காவல்துறை கண்டறிந்துள்ளது.

இந்த விவகாரம் குடேசரா கிராமத்தில் நடந்துள்ளது. சர்தாலா பகுதியைச் சேர்ந்த இந்த கிராமத்தில், சச்சின் சைனி டிவி பழுது பார்க்கும் கடையை வைத்திருந்தார். இவரது திருமணம் ஜூன் 29 அன்று ஷாம்லியின் (Shamli) ஜின்ஜானா தர்கத் நாகௌர் கிராமத்தை சேர்ந்த நேஹாவுடன் நடந்தது.

கொரோனா (Corona) நோய்த்தொற்றின் காரணமாக, இவர்களது திருமணத்திற்கு, மிகவும் நெருங்கிய உறவினர்கள் மற்றும் நண்பர்களுக்கு மட்டுமே அழைப்பு விடுக்கப்பட்டிருந்தது. ஜுன் 29 அன்று திருமணம் நடந்தது. ஜூன் 30 அன்று மணப்பெண் உட்பட மணமகன் வீட்டில் அனைவரும் அவர்களது வீட்டிற்கு வந்தனர். வீட்டிற்கு வந்தவுடன் திருமணத்தின் மற்ற சடங்குகளும் நடத்தப்பட்டன.

ஜூலை 1 அன்று தனது காலில் வலி உள்ளதாக நேஹா வீட்டினரிடம் தெரிவித்தார். அதன் பிறகு அவர் தனது அறைக்கு ஓய்வெடுக்க சென்றுவிட்டார். தனது அறைக்குள் சென்றவுடன் நேஹா தனது தந்தைக்கு ஃபோன் செய்ததாகவும், ஆனால் அதைப் பற்றி வீட்டில் இருந்தவர்களுக்கு தெரியாதென்றும் கூறப்படுகிறது. நேஹா தன் தந்தையிடம் தன் கணவன் வீட்டிற்கு வருமாறு கூறியுள்ளார்.

அன்று மதியம் நேஹாவின் தந்தை நேஹாவின் புகுந்த வீட்டிற்கு வந்துள்ளார். தன்னை நேஹா அழைத்ததாக அவர் கூறினார். நேஹா தனது அறையில் ஓய்வெடுத்துக் கொண்டிருப்பதாக எண்ணிக்கொண்டிருந்த அவர்களுக்கு நேஹாவின் தந்தையின் கூற்று ஆச்சரியத்தை அளிக்கிறது. பின்னர் அனைவரும் நேஹாவை அழைத்தும் அவரிடமிருந்து எந்த பதிலும் வரவில்லை. அறையின் கதவு உள்பக்கமாக பூட்டப்பட்டிருந்தது.

எவ்வளவு அடித்தும் கதவு திறக்கப்படாமல் போகவே, சச்சின் வீட்டினர் கதவை உடைத்து உள்ளே சென்றனர். அங்கு மின்விசிறியிலிருந்து நேஹாவின் சடலம் தொங்குவதைப் பார்த்த அனைவரும் அதிர்ச்சியில் உறைந்தனர். உடனடியாக காவல்துறைக்கு விவரம் தெரிவிக்கப்பட்டது. தான் தன் விருப்பத்தோடு தற்கொலை செய்துகொள்வதாகவும், இதில் தன் புகுந்த வீட்டாருக்கு எந்த தொடர்பும் இல்லை என்றும் நேஹா அறையில் இருந்த கண்ணாடியில் அவர் எழுதி இருந்ததாக காவல் துறை தெரிவித்துள்ளது.

இது குறித்து போலீஸ் மேலும் விசாரணை செய்து வருகிறது.

மகிழ்ச்சியாக திருமணம் செய்துகொண்டு கணவன் வீட்டிற்கு வந்த பெண் தற்கொலை செய்துகொள்ள காரணம் என்ன என்ற கேள்வியே அனைவரது மனங்களிலும் மேலோங்கி உள்ளது. குழந்தைகள், இளைஞர்கள் என அனைவருக்கும் இது குறித்த விழிப்புணர்வை ஏற்படுத்துவது நம் அனைவரின் தலையாய கடமையாகும். தற்கொலை என்பது எந்த பிரச்சனைக்கும் தீர்வாகாது என்ற கருத்து ஆழமாக அனைவரது மனங்களிலும் பதிக்கப்பட வேண்டும்.

Continue Reading

அதிர்ச்சி !! 7 வயது சிறுமியை கூட்டுப் பாலியல் பலாத்காரம் செய்து கொலை !! 27 வயது இளைஞர் கைது..

தமிழகத்தின் புதுக்கோட்டை மாவட்டத்தின் அறந்தாங்கி பகுதியை சார்ந்த சிறுமி ஜெயப்பிரியா (வயது 7). இவர் அங்குள்ள பள்ளியில் பயின்று வருகிறார். இந்நிலையில், சிறுமி சம்பவத்தன்று மாயமாகியுள்ளார்.

இவரை காணாது தேடியலைந்த பெற்றோர் சிறுமி காணாததால் பெரும் அதிர்ச்சிக்கு உள்ளாகியுள்ளனர். இந்த விஷயம் தொடர்பாக காவல் துறையினர் தகவல் தெரிவித்த நிலையில், சம்பவ இடத்திற்கு விரைந்த காவல் துறையினர் விசாரணை மேற்கொள்ள துவங்கினர்.

இந்த நிலையில், சிறுமி அங்குள்ள காட்டுப்பகுதியில் இருந்து பிணமாக மீட்கப்பட்டுள்ளார். சிறுமியின் உடலில் பாலியல் பலாத்காரம் செய்யப்பட்டதற்கான அடையாளமும், அவரது ஆடைகள் கலைந்தும் இருந்துள்ளது.

சம்பவ இடத்திற்கு விரைந்த காவல் துறையினர், சிறுமியின் பிரேதத்தை கைப்பற்றி பிரேத பிரேத பரிசோதனைக்காக மருத்துவமனைக்கு அனுப்பி வைத்துள்ளனர். இந்த விஷயம் அப்பகுதியில் பெரும் அதிர்ச்சியை ஏற்படுத்தியுள்ள நிலையில் ,

சிறுமி பாலியல் பலாத்காரம் மற்றும் கொலை தொடர்பாக காவல் துறையினர் விசாரணை மேற்கொண்டு வருகின்றனர். சிறுமியின் மரணத்திற்கு நீதி கேட்டு இணையத்தில் குரல் எழுப்பப்பட்டு வருகிறது.

காவல் துறையினரின் விசாரணையில், இதே பகுதியை சார்ந்த 27 வயது இளைஞரை சந்தேகத்தின் கீழ் கொண்டு வந்து விசாரணை செய்தனர். இதில், சிறுமியை 27 வயது இளைஞர் பாலியல் பலாத்காரம் செய்து கொலை செய்ததை ஒப்புக் கொண்டுள்ளார்.

Newstm.in

Continue Reading

நீதிமன்ற விசாரணை காரணமாக காத்திருப்போர் பட்டியலுக்கு மாற்றப்பட்ட தூத்துக்குடி ஏஎஸ்பி, டிஎஸ்பிக்கு உடனடி பதவி

சாத்தான்குளம் தந்தை மகன் மரண விவகாரத்தில் குற்றவியல் நடுவர் விசாரணையின்போது அவர் மிரட்டப்பட்டதாக எழுந்த புகாரில் மாற்றப்பட்ட தூத்துக்குடி ஏஎஸ்பி, டிஎஸ்பி இருவருக்கும் 12 மணி நேரத்தில் பணி நியமனம் வழங்கப்பட்டுள்ளது.

தூத்துக்குடி, சாத்தான்குளத்தில் பென்னிக்ஸும் அவரது தந்தை ஜெயராஜும் செல்போன் கடையைத் திறந்து வைத்திருந்ததால் வந்த விவகாரத்தில் போலீஸாரால் கைது செய்யப்பட்டு காவல் நிலையம் அழைத்துச் செல்லப்பட்டனர். பின்னர் காயங்களுடன் கோவில்பட்டி கிளைச்சிறையில் இருவரும் அடுத்தடுத்து உயிரிழந்தனர். போலீஸாரால் கடுமையாகத் தாக்கப்பட்டதில் இருவரும் உயிரிழந்ததாகக் குற்றச்சாட்டு எழுந்தது.

இந்தியா முழுவதும் பல தரப்பிலும் அதிர்வலையை ஏற்படுத்திய இந்த இருவர் மரணத்தை எதிர்க்கட்சிகள் கடுமையாகக் கண்டித்தன. தூத்துக்குடி மக்கள் வீதியில் இறங்கிப் போராட்டம் நடத்தினர். சம்பந்தப்பட்ட போலீஸார் மீது கொலை வழக்குப் பதிவு செய்ய அனைவரும் கோரிக்கை வைத்தனர். உயர் நீதிமன்ற மதுரைக் கிளை தாமாக முன் வந்து வழக்கைக் கையில் எடுத்து விசாரித்து வருகிறது.

மாநில மனித உரிமை ஆணையமும் விசாரணைக்கு உத்தரவிட்டுள்ளது. அகில இந்திய அளவில் ராகுல் காந்தி முதல் சினிமா, கிரிக்கெட் பிரபலங்கள் இவ்விவகாரத்தில் தங்கள் கண்டனத்தைப் பதிவு செய்தனர். சம்பந்தப்பட்ட போலீஸார் மீது கொலை வழக்குப் பதிவு செய்து கைது செய்ய கோரிக்கை வலுத்துவந்தது.

இந்நிலையில் சாத்தான்குளம் காவல் நிலையத்தில் வழக்கு விசாரணைக்குச் சென்ற குற்றவியல் நடுவர் பாரதிதாசனை மிரட்டியதாகப் புகார் எழுந்தது. இதையடுத்து எஸ்.பி.பாலகோபாலன், ஏஎஸ்பி குமார், டிஎஸ்பி பிரதாபன் ஆகியோர் உயர் நீதிமன்றத்தில் ஆஜராக உத்தரவிடப்பட்டது.

எஸ்.பி. அருண்பாலகோபாலன் இந்தச் சம்பவத்தைக் கையாண்ட விதம் குறித்து விமர்சனம் எழுந்தது. இந்நிலையில் எஸ்.பி. அருண்பாலகோபாலன் மாற்றப்பட்டு காத்திருப்போர் பட்டியலில் வைக்கப்பட்டார். ஏஎஸ்பி குமார், டிஎஸ்பி பிரதாபன் மாற்றப்பட்டு காத்திருப்போர் பட்டியலில் வைக்கப்பட்டனர்.

தூத்துக்குடி எஸ்.பி.யாக விழுப்புரம் எஸ்.பி. ஜெயக்குமார் நியமிக்கப்பட்டார். இந்நிலையில் காத்திருப்போர் பட்டியலில் இருந்த ஏஎஸ்பி குமார் மற்றும் டிஎஸ்பி பிரதாபனுக்கு உடனடியாக பதவி வழங்கப்பட்டுள்ளது. இதற்கான உத்தரவை டிஜிபி அலுவலகம் பிறப்பித்துள்ளது.

1. தூத்துக்குடி ஏஎஸ்பியாக பதவி வகித்து காத்திருப்போர் பட்டியலுக்கு மாற்றப்பட்ட குமார் நீலகிரி மாவட்ட மதுவிலக்கு அமல் ஏஎஸ்பியாக நியமிக்கப்பட்டுள்ளார்.

2.தூத்துக்குடி டிஎஸ்பியாக இருந்து காத்திருப்போர் பட்டியலில் உள்ள பிரதாபன் புதுகோட்டை மாவட்ட நில அபகரிப்பு பிரிவு டிஎஸ்பியாக நியமிக்கப்பட்டுள்ளார்.

3.நீலகிரி மாவட்ட மதுவிலக்கு அமல் கூடுதல் டிஎஸ்பி கோபி தூத்துக்குடி மாவட்ட பெண்கள் குழந்தைகளுக்கு எதிரான குற்றத்தடுப்புப் பிரிவு கூடுதல் எஸ்பியாக நியமிக்கப்பட்டுள்ளார்.

4. கள்ளக்குறிச்சி சப் டிவிஷன் டிஎஸ்பி ராமநாதன் சாத்தான்குளம் சப்டிவிஷன் டிஎஸ்பியாக நியமிக்கப்பட்டுள்ளார்.

Source : www.hindutamil.in

Continue Reading

சாத்தான்குளம் ஜெயராஜ், பென்னிக்ஸ் மரணம்: ஐபிஎஸ் அதிகாரிகள் சங்கம் கண்டனம்

சாத்தான்குளம் ஜெயராஜ், பென்னிக்ஸ் மரண விவகாரத்தில் நாடு முழுவதும் கண்டனம் வலுத்து வரும் நிலையில் அகில இந்திய ஐபிஎஸ் அதிகாரிகள் சங்கமும் கண்டனம் தெரிவித்து உரிய விசாரணை நடத்தி நியாயம் கிடைக்கச் செய்யவேண்டும் என அறிவுறுத்தியுள்ளது.

தூத்துக்குடி சாத்தான்குளத்தில் பென்னிக்ஸும் அவரது தந்தை ஜெயராஜும் செல்போன் கடையைத் திறந்து வைத்திருந்ததால் வந்த விவகாரத்தில் போலீஸாரால் கைது செய்யப்பட்டு காவல் நிலையம் அழைத்துச் செல்லப்பட்டனர். பின்னர் காயங்களுடன் கோவில்பட்டி கிளைச்சிறையில் அனுமதிக்கப்பட்டதில் இருவரும் அடுத்தடுத்து உயிரிழந்தனர். போலீஸாரால் கடுமையாகத் தாக்கப்பட்டதில் இருவரும் உயிரிழந்ததாகக் குற்றச்சாட்டு எழுந்தது.

தமிழகத்தில் அதிர்வலையை ஏற்படுத்திய இந்த இருவர் மரணத்தை எதிர்க்கட்சிகள் கடுமையாகக் கண்டித்தன. தூத்துக்குடி மக்கள் வீதியில் இறங்கிப் போராட்டம் நடத்தினர். சம்பந்தப்பட்ட போலீஸார் மீது கொலை வழக்குப் பதிவு செய்ய அனைவரும் கோரிக்கை வைத்தனர். உயர் நீதிமன்ற மதுரைக் கிளை தாமாக முன் வந்து வழக்கைக் கையில் எடுத்து விசாரித்து வருகிறது.

மாநில மனித உரிமை ஆணையமும் விசாரணைக்கு உத்தரவிட்டுள்ளது. இந்நிலையில் சாத்தான்குளம் காவல் நிலையத்தில் வழக்கு விசாரணைக்குச் சென்ற குற்றவியல் நடுவர் பாரதிதாசனை மிரட்டியதாகப் புகார் எழுந்தது. இதையடுத்து எஸ்.பி. பாலகோபாலன், ஏஎஸ்பி குமார், டிஎஸ்பி பிரதாபன் ஆகியோர் உயர் நீதிமன்றத்தில் ஆஜராக உத்தரவிடப்பட்டது.

மாஜிஸ்திரேட் விசாரணைக்கு போலீஸ் ஒத்துழைப்பு தரவில்லை என்ற புகாரில் நடவடிக்கை எடுக்க மதுரை உயர் நீதிமன்ற மதுரைக் கிளை உத்தரவிட்டது. சாத்தான்குளம் காவல் நிலையத்தை வருவாய்த்துறை கட்டுப்பாட்டுக்குள் கொண்டு வரும் நடவடிக்கையாக வட்டாட்சியர் செந்தூர்ராஜன் நியமிக்கப்பட்டார்.

இந்த நிகழ்வு காவல்துறையில் பெரிய நிகழ்வாகப் பார்க்கப்படுகிறது. அகில இந்திய அளவில் இந்த வழக்கு போகும் தன்மையை உன்னிப்பாகக் கவனிக்கிறார்கள் அதனால் பலரும் இதன் மீது கருத்து தெரிவிக்கின்றனர்.

இந்நிலையில் அகில இந்திய ஐபிஎஸ் அதிகாரிகள் சங்கம் இந்த விவகாரத்தில் தனது கண்டனத்தைப் பதிவு செய்துள்ளது.

ஐபிஎஸ் அதிகாரிகள் சங்கம் ட்விட்டர் பக்கத்தில் வெளியிட்ட பதிவு:

'போலீஸ் காவலில் உள்ள குடிமக்களுக்கு எதிரான வன்முறைச் செயல்களை நாங்கள் கண்டிக்கிறோம். தூத்துக்குடி மாவட்டத்தின் வழக்கை விரைவாகவும் நியாயமாகவும் விசாரிக்க விசாரணை நிறுவனங்களுக்கு நாங்கள் அறிவுறுத்துகிறோம்'.

இவ்வாறு ஐபிஎஸ் அதிகாரிகள் சங்கம் தெரிவித்துள்ளது.

Source : www.hindutamil.in

Continue Reading

பென்னிக்ஸின் பிறப்புறுப்பில் எட்டி உதைத்த காவலர்கள்! உடற்கூராய்வில் தகவல்

தூத்துக்குடி மாவட்டம் கோவில்பட்டி அருகே இருக்கும் சாத்தான்குளத்தைச் சேர்ந்த ஜெயராஜ் மற்றும் பென்னிக்ஸ் காவல்துறையினரால் தாக்கப்பட்டு சிறையில் உயிரிழந்த விவகாரம் பெரும் சர்ச்சையை ஏற்படுத்தியது. இச்சம்பவம் தொடர்பாக மதுரை உயர்நீதிமன்றக்கிளை தாமாக முன்வந்து விசாரணை நடத்தி வருகிறது. அதில் இன்று நெல்லை மருத்துவக் கல்லூரி மருத்துவமனை டீன் உயிரிழந்தவர்களின் பிரேதப் பரிசோதனை அறிக்கையைத் தாக்கல் செய்திருக்கிறார். அந்த அறிக்கையில், இருவரின் உடலில் அதிக அளவு காயம் இருந்தது. இதனால் சாத்தான்குளம் காவலர்கள் மீது வழக்குப்பதிவு முகாந்திரம் உள்ளது என நீதிபதிகள் தெரிவித்தனர். மேலும், காவலர்கள் கொடுத்த அறிக்கைக்கும் பிரேதப் பரிசோதனை அறிக்கைக்கு மாறுபாடுகள் அதிகமாக இருப்பதாகவும் நீதிபதிகள் தெரிவித்தனர். அதன் அடிப்படையில் சிபிசிஐடி விசாரணை தொடரலாம். டிஜிபியின் உத்தரவிற்காக காத்திருக்காமல் நீதிமன்ற உத்தரவின் அடிப்படையில் உடனடியாக விசாரணையை கையிலெடுக்க வேண்டும்' என்றும் உத்தரவிட்டுள்ளது.

சாத்தான்குளம் சம்பவம் தொடர்பாக நேரில் சென்று விசாரணை நடத்திய நீதித்துறை நடுவர் பாரதிதாசன் உயர்நீதிமன்ற மதுரைக் கிளைக்கு சமர்பித்திருக்கும் அறிக்கையில் பல்வேறு திடுக்கிடும் தகவல்களும் இடம் பெற்றுள்ளன. அதில், சாத்தான்குளம் காவல்நிலையத்தில் பணியாற்றிய நேரடி சாட்சியான தலைமைக்காவலர் ரேவதியிடம் விசாரணை நடத்தியதில், ஜெயராஜ், மகன் பென்னிக்ஸை காவலர்கள் விடிய விடிய கடுமையாக தாக்கியதையும், இதனால் காவல்நிலைய மேஜை மற்றும் லத்தியில் ரத்தக்கறை ஏற்பட்டதையும் தெரிவித்ததாக குறிப்பிடப்பட்டிருந்தது.

இந்நிலையில் பென்னிக்ஸின் பிறப்புறுப்பில் எட்டி உதைத்ததற்கான அடையாளங்களும் உடற்கூராய்வில் தெரியவந்தது. மருத்துவமனையில் அனுமதிக்கப்பட்ட போதும், பென்னிக்ஸின் போர்வையில் ரத்தக்கறை படிந்திருந்தது கண்டறியப்பட்டுள்ளது.

Continue Reading

சாத்தான்குளம் மரணங்கள்; உண்மையை மறைத்த முதல்வர் பழனிசாமி பதவியில் நீடிக்கும் தார்மீக உரிமையை இழந்துவிட்டார்; காவல்துறையை வேறொருவரிடம் ஒப்படைக்க வேண்டும்: ஸ்டாலின்

சாத்தான்குளம் சம்பவத்தில் உண்மையை மறைத்த எடப்பாடி பழனிசாமி முதல்வர் பதவியில் வகிக்கும் தார்மீக உரிமையை இழந்துவிட்டார் என, திமுக தலைவர் மு.க.ஸ்டாலின் விமர்சித்துள்ளார்

இது தொடர்பாக மு.க.ஸ்டாலின் இன்று (ஜூன் 30) வெளியிட்ட அறிக்கை:

"ஜெயராஜ் மற்றும் பென்னிக்ஸ் ஆகியோரின் கொலை வழக்கு விசாரணையை உடனடியாக சிபிசிஐடி மேற்கொள்ள வேண்டும் என்று சென்னை உயர் நீதிமன்ற மதுரைக் கிளையின் நீதிபதிகள் பிறப்பித்துள்ள உத்தரவு, கணவரையும் - மகனையும் இழந்து நிற்கும் அந்தக் குடும்பத்திற்கு வழங்கப்பட்டுள்ள முதற்கட்ட நீதி. இந்த வழக்கினை விசாரணை செய்ய சாத்தான்குளம் காவல் நிலையத்திற்குச் சென்ற நீதிபதியை, முதல்வர் பழனிசாமியின் நேரடிக் கட்டுப்பாட்டில் இருக்கும் காவல்துறை அதிகாரிகள் நேற்றைய தினம் மிரட்டியிருப்பது, 'பேய் அரசு செய்தால் பிணந்தின்னும் சாத்திரங்கள்' என்பதை நினைவுபடுத்துகிறது.

சென்னை உயர் நீதிமன்ற மதுரைக் கிளைப் பதிவாளரிடம் கோவில்பட்டி முதலாவது நீதித்துறை நடுவர் 29.6.2020 மின்னஞ்சல் மூலம் அளித்துள்ள அறிக்கையைப் பார்க்கும்போது, ஒரு நீதித்துறை நடுவருக்கே காவல் நிலையத்தில் இந்தக் கொடுமை என்றால், ஜெயராஜையும், பென்னிக்ஸையும் அந்தக் காவல் நிலையத்தில் வைத்து எப்படியெல்லாம் கொடுமைப்படுத்தியிருப்பார்கள்; எப்படியெல்லாம் விடிய விடிய லத்தியால் அடித்துத் துன்புறுத்தியிருப்பார்கள் என்பதை நினைத்து நெஞ்சம் பதறுகிறது.

கோவில்பட்டி நீதிமன்ற நடுவரின் அறிக்கையில்,

'1) காவல் நிலையத்தில் இருந்த குமார் கூடுதல் டிஎஸ்பி எவ்வித முறையான வணக்கமும் செய்யாமல் தனது உடல்பலத்தைக் காட்டுவதற்கான உடல் அசைவுகளுடன் மிரட்டும் தொனியிலான பார்வையுடனும் உடல் அசைவுகளுடன் நின்றார்.

2) காவல் நிலையப் பொது நாட்குறிப்பேடு மற்றும் இதரப் பதிவேடுகளைக் கேட்டபோது அவற்றை சமர்ப்பிக்கவில்லை.

3) அங்குள்ள சிசிடிவி 'ஹார்ட் டிஸ்க்' தினப்படி தானாகவே அழிந்து போகும் வகையில் ஏற்பாடு (Settings) செய்யப்பட்டிருந்தது.

4) சம்பவம் நடைபெற்ற 19.6.2020 தொடர்பான காணொலிப் பதிவுகள் அழிக்கப்பட்டு இருந்தன.

5) நீதிமன்ற ஊழியர்களின் அறிவுறுத்தல்களைப் பின்பற்றாமல் அங்கு நின்ற காவலர்கள் கிண்டல் செய்த காரணத்தால், சம்பவ இடத்து சாட்சியத்தை பதிவு செய்வதில் மிகுந்த சிரமம் ஏற்பட்டது.

6) விடிய விடிய லத்தியால் அடிக்கப்பட்டு லத்தி மற்றும் டேபிளில் ரத்தக்கறை படிந்துள்ளது.

7) லத்திகளைக் கொடுக்கும்படி கூறியும் அங்கிருந்த காவலர்கள் காதில் ஏதும் விழாதது போல் இருந்தார்கள். மகாராஜன் என்னைப் பார்த்து 'உன்னால ஒன்றும் செய்ய முடியாது' என இழிவாகக் கூறினார். லத்தியைக் கேட்டபோது, 'வரேன் இரு' என்று ஒருமையில் பேசினார்.

8) போலீஸ் சூழ்ந்து கொண்டு நடக்கும் நிகழ்வுகளை தனது செல்போனில் பதிவு செய்து கொண்டும், நீதிமன்ற ஊழியர்களை மிரட்டிக் கொண்டும் இருந்தார்கள் என்று இடம்பெற்றுள்ள அதிர்ச்சி தரும் வரிகள், நீதிபதியையே அதிமுக ஆட்சியில் மிரட்டுவார்கள் என்பதற்கான சாட்சியமாக அமைந்துள்ளது' எனக் குறிப்பிடப்பட்டுள்ளது.

இந்த அறிக்கையின் அடிப்படையில் உயர் நீதிமன்ற மதுரைக் கிளையின் நீதிபதிகள், 'நீதித்துறை நடுவர் விசாரணை செய்வதைத் தடுப்பதற்கு மாவட்ட போலீஸ் நிர்வாகம் தன்னிடம் உள்ள அனைத்து அதிகாரத்தையும் பயன்படுத்துகிறது' என்று தாங்களாகவே முன்வந்து பிறப்பித்த உத்தரவில் கூறியிருப்பது, காவல்துறையைக் கையில் வைத்திருக்கும் முதல்வர் பழனிசாமி வெட்கித் தலைகுனிய வேண்டிய பெருத்த அவமானம்.

கூடுதல் டிஎஸ்பி என்பவர் தூத்துக்குடி மாவட்டக் கண்காணிப்பாளர் அலுவலகத்தில் இருக்கும் மாவட்ட அளவிலான அதிகாரி. அவர் 60 கிலோ மீட்டர் தொலைவில் உள்ள சாத்தான்குளம் காவல்நிலையத்திற்கு எப்படிச் சென்றார்?

உயர் நீதிமன்றம் அனுப்பிய ஒரு நீதிபதியை ஒரு காவலர் தானாகவே மிரட்டினார் என்பதை எப்படி நம்புவது?

மன உளைச்சல் இருந்தால் யாரை வேண்டுமானாலும் மிரட்டலாமா?

இந்த மிரட்டல் - உருட்டல், ஆவணங்கள் தர மறுப்பு, காவல் நிலையத்தில் கொலைக்கான சாட்சியங்கள் அழிப்பு ஆகிய அனைத்தும் கூடுதல் டிஎஸ்பி, டிஎஸ்பி, ஆகியோரளவில் முடிவு எடுத்து அரங்கேற்றப்பட்டவை என்பதை நம்ப முடியாது.

உயர் நீதிமன்றம் தாமாகவே முன்வந்து விசாரிக்கும் ஒரு வழக்கில், துறை அமைச்சரான முதல்வர் பழனிசாமிக்குத் தெரியாமல் இவை அனைத்தும் நடந்து விட்டன என்பதைத் துளியும் நம்ப முடியவில்லை!

'ஜெயராஜ் மற்றும் பென்னிக்ஸ் ஆகிய இருவரும் தரையில் அமர்ந்து புரண்டதால் ஊமைக் காயம் ஏற்பட்டது' என்று போடப்பட்டுள்ள முதல் தகவல் அறிக்கை பொய்யானது என்பதற்கு ஆதாரமாக, ஜெயராஜின் பக்கத்துக் கடையில் இருந்த கேமராவில் உள்ள வீடியோ காட்சிகள் நேற்றைய தினம் வெளியானது. இப்போது காவல் நிலையமே ரத்தக்களறியாக இருந்திருக்கிறது என்பது போன்ற நீதித்துறை நடுவரின் அறிக்கை அதை நிரூபித்துள்ளது.

இருவரும் உடல்நலக்குறைவு ஏற்பட்டதால், மூச்சுத் திணறல் ஏற்பட்டதால் மருத்துவமனையில் சேர்க்கப்பட்டு மரணமடைந்தார்கள் என்று முதல்வர் சொன்னதன் பின்னணி இந்த ரத்தக் களறியை மறைக்கத்தானே!

முதல்வர் பழனிசாமி: கோப்புப்படம்

குறிப்பாக, காவல் நிலைய மரணம் அல்ல, இது ஏதோ நீதிமன்றக் காவலில் ஏற்பட்ட விவகாரம் என்று திசை திருப்பத்தானே!

உயர் நீதிமன்றம் தலையிட்ட பிறகு கூடுதல் டிஎஸ்பியும், டிஎஸ்பியும் மாற்றப்பட்டு காத்திருப்போர் பட்டியலில் வைக்கப்பட்டு, மகாராஜன் என்ற காவலர் தற்காலிகப் பணி நீக்கம் செய்யப்பட்டுள்ளார். ஆனால் சம்பந்தப்பட்ட எஸ்.பி.யை கடைசிவரை காப்பாற்ற நினைத்து, இன்று அவரையும் மாற்றியிருக்கிறார்கள்.

உயர் நீதிமன்றம் தாமாக முன்வந்து வழக்கினை எடுத்த பிறகுதான் இவை அனைத்தும் நடந்துள்ளதே தவிர, பாதிக்கப்பட்ட ஜெயராஜ் குடும்பத்திற்கு நீதி வழங்க வேண்டும் என்ற உணர்வுடன் அதிமுக அரசே தானாகவும் செயல்படவில்லை; பொதுமக்களும், எதிர்க்கட்சிகளும் போராடிய பிறகும் செய்யவில்லை.

'சாத்தான்குளம் காவல் நிலையத்தை வருவாய்த் துறை அதிகாரிகளின் நேரடிக் கட்டுப்பாட்டில் கொண்டுவர வேண்டும்' என்று உயர் நீதிமன்றமே மாவட்ட ஆட்சியருக்கு உத்தரவிட்டது தமிழகக் காவல்துறை வரலாற்றில் மிகப் பெரியதொரு கரும்புள்ளி! பிறகு காவல்துறையை முதல்வர் இன்னும் வைத்திருப்பது ஏன்?

'நீதித்துறை நடுவர் அறிக்கையும், உடற்கூராய்வு அறிக்கையும் சம்பந்தப்பட்ட காவல்துறை அதிகாரிகள் மீது இந்திய தண்டனைச் சட்டம் 302-வது பிரிவின்கீழ் கொலை வழக்குப் பதிவு செய்ய போதிய ஆதாரங்களாக உள்ளன' என்று உயர் நீதிமன்றமே கண்டுபிடித்துச் சொல்லியுள்ள நிலையில், துறை அமைச்சராக இருந்த முதல்வர் பழனிசாமி எப்படி அவர்கள் உடல்நலக்குறைவால் இறந்தார்கள் என்று மறைத்து, அபாண்டமாக அறிக்கை வெளியிட்டார்?

ஆகவே, இரட்டைக் கொலையை மறைக்க சாத்தான்குளம் காவல் நிலைய அதிகாரிகளுடன் முதல்வரும் இணைந்தே செயல்பட்டார் என்பதைத் தவிர, இதற்கு வேறு என்ன அர்த்தம்?

இவ்வளவுக்குப் பிறகும், அங்குள்ள சில காவல்துறை அதிகாரிகளின் அராஜகம், வெறியாட்டம் குறித்து உயர் நீதிமன்றம் இவ்வளவு கண்டிப்புடன் உத்தரவுகளைப் பிறப்பித்த பிறகும், முதல்வர் உணர்ந்து கொண்டதாகத் தெரியவில்லை.

பெண் எஸ்.பி. ஒருவரே பாலியல் புகார் அளித்து, வழக்கு நிலுவையில் உள்ளவரும், முதல்வர் உள்ளிட்ட பல அதிமுக அமைச்சர்களின் ஊழல் புகார்களைத் திட்டமிட்டு நீர்த்துப் போக வைத்தவருமான முருகன் தென் மண்டல ஐ.ஜி.யாக நியமிக்கப்பட்டுள்ளார். மக்கள் நல்வாழ்வுத்துறை அமைச்சர் விஜயபாஸ்கர், முன்னாள் டிஜிபிக்கள் டி.கே. ராஜேந்திரன், ஜார்ஜ் ஆகியோர் சிக்கியுள்ள குட்கா வழக்கில் விசாரிக்கப்பட்ட ஜெயக்குமாரை, தூத்துக்குடி எஸ்.பி.யாக நியமித்திருக்கிறார். சட்டம் - ஒழுங்கை நிலைநாட்டுவதற்கு, உள்நோக்கத்துடன் இதுபோன்ற அதிகாரிகளைத் தேர்ந்தெடுத்த முதல்வருக்கு என்ன அக்கறை பாருங்கள்!

இரட்டைக் கொலை நடந்த பிறகும், நேர்மையான திறமையான காவல்துறை அதிகாரிகளை சட்டம்- ஒழுங்குப் பணிகளில் நியமிக்க வேண்டும், பொதுமக்களுக்கு நம்பிக்கையூட்டும் நடவடிக்கைகளை அரசு எடுக்க வேண்டும் என்ற எண்ணம் முதல்வர் பழனிசாமிக்கு எள்முனையளவு கூட இல்லாதது மிகுந்த வேதனையளிக்கிறது.

ஆகவே, காவல்துறையின் கட்டுப்பாட்டில் உள்ள ஒரு காவல் நிலையத்தையே நிர்வகிக்க முடியாமல் தோல்வியடைந்த காவல் நிலையத்தில் நடத்தப்பட்ட காட்டுமிராண்டித்தனமான கொலைகளை, உடல்நலக்குறைவால் மரணம் என்று மனசாட்சி இல்லாமல், உண்மையை வேண்டுமென்றே மறைத்த பழனிசாமி தனது முதல்வர் பதவியில் நீடிக்கும் தார்மீக உரிமையை இழந்து விட்டார். எனவே, அவர் உடனடியாக முதல்வர் பதவியை ராஜினாமா செய்திட வேண்டும் என்று கேட்டுக் கொள்கிறேன்.

'கமிஷன்', 'கரெப்ஷன்', 'கலெக்ஷன்' என்பதால், 'பதவியை' விட்டுச் செல்ல மனமில்லை என்றால் குறைந்தபட்சம் போலீஸ் துறையின் பொறுப்பையாவது வேறு ஒருவரிடம் ஒப்படைக்க வேண்டும் என்றும், உயர் நீதிமன்ற உத்தரவுப்படி இ.த.ச. 302-ன் கீழ் கொலை வழக்குப் பதிவு செய்து உடனே சம்பந்தப்பட்ட காவல் அதிகாரிகளை கைது செய்வதோடு அவர்களுக்கு உதவியாக இருந்து இந்த இரட்டைக் கொலையை மறைக்க துணை போன அனைவரையும் குற்றவாளிகளாகச் சேர்க்க வேண்டும் என்றும் வலியுறுத்திக் கேட்டுக் கொள்கிறேன். அப்போதுதான் சாத்தான்குளம் இரட்டைக் கொலை வழக்கில் தவறிழைத்தோர் அனைவரும் தண்டிக்கப்படுவார்கள், அப்பாவிகளாக காவல் நிலையத்திற்கு வந்து, பிரேதங்களாக அனுப்பப்பட்ட ஜெயராஜ், பென்னிக்ஸ் ஆகியோரை இழந்து வாடும் குடும்பத்திற்கு நீதி கிடைக்கும் என்று தெரிவித்துக் கொள்கிறேன்".

இவ்வாறு ஸ்டாலின் தெரிவித்துள்ளார்.

Source : www.hindutamil.in

Continue Reading

ரத்தம் வழியும் நிலையில் காரில் சென்ற பென்னிக்ஸ்.. ஒருவர்கூட இதுவரை கைது செய்யப்படாதது ஏன் ?- கனிமொழி

தூத்துக்குடி மாவட்டம் கோவில்பட்டி அருகே இருக்கும் சாத்தான்குளத்தைச் சேர்ந்த ஜெயராஜ் மற்றும் பென்னிக்ஸ் காவல்துறையினரால் தாக்கப்பட்டு சிறையில் உயிரிழந்த விவகாரம் பெரும் சர்ச்சையை ஏற்படுத்தியது. இந்நிலையில் பென்னிக்ஸின் பிறப்புறுப்பில் எட்டி உதைத்ததற்கான அடையாளங்களும் உடற்கூராய்வில் தெரியவந்தது. மருத்துவமனையில் அனுமதிக்கப்பட்ட போதும், பென்னிக்ஸின் போர்வையில் ரத்தக்கறை படிந்திருந்தது கண்டறியப்பட்டுள்ளது.

ஜெயராஜ், பென்னிக்ஸ் ஆகிய இருவரும் கடுமையாக தாக்கப்பட்டு ரத்தம் வழியும் நிலையில் அழைத்து செல்லப்பட்டிருக்கிறார்கள். அவர்கள் சென்ற காரின் இருக்கையிலும் ரத்தக்கறை படிந்து உள்ளது. இப்படியிருக்க, மருத்துவர் எப்படி உடற்தகுதி சான்றிதழ் அளித்தார் ? 1/2#EPSsupportsPoliceBrutality pic.twitter.com/b9lYUPP29R

- Kanimozhi (கனிமொழி) (@KanimozhiDMK)

இந்த செய்தியை ட்விட்டரில் பகிர்ந்துள்ள திமுக மகளிரணி தலைவர் கனிமொழி எம்.பி, "ஜெயராஜ், பென்னிக்ஸ் ஆகிய இருவரும் கடுமையாக தாக்கப்பட்டு ரத்தம் வழியும் நிலையில் அழைத்து செல்லப்பட்டிருக்கிறார்கள். அவர்கள் சென்ற காரின் இருக்கையிலும் ரத்தக்கறை படிந்து உள்ளது. இப்படியிருக்க, மருத்துவர் எப்படி உடற்தகுதி சான்றிதழ் அளித்தார் ? மாஜிஸ்திரேட் எப்படி இதனை கவனிக்காமல் விட்டார் ? சிறை அதிகாரிகள் இருவரையும் மருத்துவமனைக்கு அனுப்பாமல் எதற்காக சிறையில் அடைத்தனர் ? இவற்றுக்கான காரணங்கள் தெளிவாகத் தெரிந்தும் ஒருவர்கூட இதுவரை கைது செய்யப்படாதது ஏன் ? " என பதிவிட்டுள்ளார்.

Continue Reading

உயர்நீதிமன்றம் : சாத்தான்குளம் "காவலர்கள் மீது கொலை வழக்கு பதிவுசெய்து விசாரிக்கலாம்"

BBC : சாத்தான் குளம் தந்தை - மகன் காவல்துறையினரால் அடித்துக் கொல்லப்பட்டதாகக் கூறப்படும் விவகாரத்தில் சம்பந்தப்பட்ட காவலர்கள் மீது கொலை வழக்குப் பதிவுசெய்து விசாரிக்கலாம் என சென்னை உயர் நீதிமன்றத்தின் மதுரைக் கிளை உத்தரவிட்டுள்ளது. முன்னதாக காலை 10.30 மணிக்கு நீதிபதிகள் பி.என். பிரகாஷ் - புகழேந்தி அமர்வு முன்பாக இந்த வழக்கு விசாரணைக்கு வந்தது.
அப்போது ஆஜரான அரசுத் தரப்பு கூடுதல் வழக்கறிஞர், ஒருவார காலமாக இருந்த மன அழுத்தத்தின் காரணமாக சில சம்பவங்கள் நடந்துவிட்டதாகவும் வழக்கு தற்போது சி.பி.ஐயிடம் ஒப்படைக்கப்பட்டுள்ளதாகவும் தெரிவித்தார்.
ஆனால், இந்த வழக்கில் ஒரு விநாடியைக்கூட வீணாக்க விரும்பவில்லையென தெரிவித்த நீதிபதிகள், சி.பி.ஐ. இந்த வழக்கைப் பொறுப்பேற்கும்வரை, வழக்கை நெல்லை காவல்துறை விசாரிக்கலாம் எனக் கூறினர். பிறகு இந்த வழக்கு, பகல் 12 மணிக்கு ஒத்திவைக்கப்பட்டது  வழக்கு மீண்டும் விசாரணைக்கு வந்தபோது, இந்த வழக்கில் பிரேதப் பரிசோதனை அறிக்கை, நீதித் துறை நடுவரின் அறிக்கையின் அடிப்படையில் நெல்லை மாவட்ட சிபிசிஐடி டிஎஸ்பி அனில்குமார் வழக்குப் பதிவுசெய்து விசாரணையைத் துவங்கலாம் என நீதிபதிகள் உத்தரவிட்டனர்.

காவல்துறைத் தலைவரின் முறையான கடிதத்திற்காகக் காத்திருக்காமல் உடனடியாக விசாரணையைத் துவங்கலாம் என்றும் நீதிபதிகள் தெரிவித்தனர். இந்த வழக்கில் அடிப்படை முகாந்திரம் இருப்பதால் சம்பந்தப்பட்டக் காவலர்கள் மீது கொலை வழக்குப் பதிவு செய்யலாம் என்றும் நீதிபதிகள் கூறியுள்ளன இந்த விவகாரத்தில் முக்கிய சாட்சியமாகக் கருதப்படும் சாத்தான் குளம் காவல் நிலைய காவலர் ரேவதி மற்றும் அவரது குடும்பத்தினருக்கு தகுந்த பாதுகாப்பு அளிக்க வேண்டுமென்றும் அந்தக் காவல் நிலையத்தில் சாட்சியங்கள் அழிந்துவிடாமல் இருக்க, அங்கு தூத்துக்குடி வருவாய்த் துறையிலிருந்து இரண்டு அலுவலர்களை நியமித்து கண்காணிக்க வேண்டுமென்றும் நீதிபதிகள் உத்தரவிட்டர்.
வழக்கு ஜூலை 2ஆம் தேதிக்கு ஒத்திவைக்கப்பட்டுள்ளது.

ஜெயராஜ் மற்றும் பென்னிக்ஸ்

சாத்தான்குளம் அரசரடி தெருவைச் சேர்ந்த ஜெயராஜ் (58) மற்றும் அவரது மகன் பென்னிக்ஸ் (31) ஆகியோர் சாத்தான்குளத்தில் காமராஜர் சிலை அருகே ஏபிஜே மொபைல்ஸ் என்ற பெயரில் ஒரு செல்போன் கடையை நடத்திவந்தனர்.
ஜூன் 19 அன்று இரவில் கடையை அடைப்பது தொடர்பாக காவல்துறையினருக்கும் பென்னிக்சுக்கும் தகராறு ஏற்பட்டுள்ளது.
இதையடுத்து ஜூன் 19ஆம் தேதியன்று பென்னீஸ் மீதும் அவரது தந்தை ஜெயராஜ் மீதும் சாத்தான்குளம் காவல்துறையினர் முதல் தகவல் அறிக்கை பதிவுசெய்தனர்
இதற்குப் பிறகு, பென்னிக்ஸ் அவரது தந்தை ஜெயராஜை கைது செய்த காவல்துறையினர், 21ஆம் தேதி கோவில்பட்டி கிளைச் சிறையில் அடைத்தனர்.
இது தொடர்பாக காவல்துறை பதிவுசெய்த முதல் தகவல் அறிக்கையில், காவல் துறையினரை திட்டிவிட்டு அவர்களே "தரையில் புரண்டார்கள். அதில் அவர்களுக்கு ஊமைக் காயம் ஏற்பட்டது," எனக் கூறப்பட்டுள்ளது.
இந்த நிலையில், திங்கட்கிழமையன்று (ஜூன் 22) இரவில் பென்னிக்சும் செவ்வாய்க்கிழமையன்று (ஜூன் 23) அதிகாலையில் ஜெயராஜும் உயிரிழந்தனர்.

இந்த விவகாரம் தொடர்பாக சென்னை உயர் நீதிமன்றத்தின் மதுரைக் கிளை தாமாக முன்வந்து விசாரணை நடத்திவருகிறது. நீதிபதிகள் பிரகாஷ் மற்றும் புகழேந்தி அடங்கிய அமர்வு இந்த வழக்கை இன்று விசாரித்தது.
அப்போது, பிரேதப் பரிசோதனை அறிக்கையும் நீதித்துறை நடுவரின் அறிக்கையும் தங்களுக்கு வந்து சேர்ந்துவிட்டதாகவும் இறந்தவர்கள் உடலில் கடுமையான காயங்கள் இருந்தது இதிலிருந்து தெரிவதாகவும் நீதிபதிகள் தெரிவித்தனர்.

இந்த விவகாரத்தை சி.பி.ஐக்கு மாற்றி மாநில அரசு உத்தரவிட்டிருந்தாலும் அவர்கள் விசாரணையைத் துவங்க சில நாட்கள் ஆகும்; ஆனால், தாங்கள் இந்த வழக்கில் ஒரு விநாடியைக்கூட வீணாக்க விரும்பவில்லை. ஆகவே அதுவரை நெல்லை சரக காவல்துறை இந்த வழக்கை விசாரிக்க முடியுமா எனக் கேள்வியெழுப்பினர்.
நீதித் துறை நடுவரை அவதூறாகப் பேசிய வழக்கில் சம்பந்தப்பட்ட காவல்துறையினர் மூவரும் தங்களுக்கென வழக்கறிஞர்களை நியமித்து, தங்கள் தரப்பு வாதத்தை அளிக்க வேண்டும் எனக் கூறி வழக்கை நான்கு வாரங்களுக்கு ஒத்திவைக்கப்பட்டுள்ளது

Continue Reading

சாத்தான்குளம்: அந்த இரவில் காவல்நிலையத்தில் நடந்தது என்ன? நீதித் துறை நடுவர் அறிக்கை

BBC TAMIL: காவல்துறை தாக்குதலால் உயிரிழந்ததாகக் கூறப்படும் ஜெயராஜும் பென்னிக்சும் விடியவிடிய காவல்துறையினரால் தாக்கப்பட்டதாக நீதித் துறை நடுவரின் அறிக்கை தெரிவிக்கிறது. தான் விசாரணை மேற்கொண்டபோது அங்கிருந்த காவலர்கள் தன்னிடம் மோசமாக நடந்துகொண்டதாகவும் நீதித் துறை நடுவர் தெரிவித்துள்ளார்.

சாத்தான் குளம் தந்தை - மகன் ஆகியோர் காவல்துறையினரால் அடித்துக்கொல்லப்பட்டதாகக் கூறப்படும் விவகாரத்தில், கோவில்பட்டி நீதித் துறை நடுவர் பாரதிதாசன் விசாரணை மேற்கொண்டார். இது தொடர்பான விசாரணை அறிக்கை சென்னை உயர் நீதிமன்றத்தின் மதுரைக் கிளையில் தாக்கல் செய்யப்பட்டுள்ளது.

அந்த விசாரணை அறிக்கையில், சாத்தான் குளம் காவல் நிலையத்தில் இருந்த காவலர்கள் விசாரணைக்கு ஒத்துழைக்கவில்லையென்றும் மரியாதைக் குறைவாகவும் மிரட்டு வகையிலும் நடந்துகொண்டார்கள் என நீதித் துறை நடுவர் கூறியுள்ளார்.

சாத்தான் குளம் விவகாரத்தை விசாரணை செய்வதற்காக நீதித்துறை நடுவர் பாரதிதாசன் 28ஆம் தேதி காலை, நீதிமன்ற ஊழியர்களுடன் சென்றுள்ளார். அப்போது அந்தக் காவல் நிலையத்தின் ஆய்வாளர் அறையில் காவல்துறை கூடுதல் கண்காணிப்பாளர் டி. குமாரும் மற்றொரு காவல்துறை அதிகாரியான சி. குமாரும் இருந்துள்ளனர்.

தான் உள்ளே நுழைந்ததும் எவ்வித வணக்கமோ, வரவேற்போ செய்யாமல் தனது உடல்பலத்தைக் காட்டுவதான அசைவுகளோடும் மிரட்டும் தொனியிலான பார்வையுடனும் டி. குமார் இருந்ததாக நீதித்துறை நடுவரின் அறிக்கை குற்றம்சாட்டுகிறது.

அங்கிருந்தவர்களிடம் பொது நாட்குறிப்பையும் பதிவேடுகளையும் கேட்டபோது அவற்றை சமர்ப்பிக்க முறையாக நடவடிக்கை எடுக்காமல், நிலையக் காவலர்களை ஒருமையில் திட்டியபடியே இருந்ததாகவும் அந்த அறிக்கை கூறுகிறது. இதற்குப் பிறகு அவர்கள் வெளியில் இருக்கும்படி பணிக்கப்பட்டனர். பிறகு சம்பந்தப்பட்ட பதிவேடுகள் எழுத்தர் மூலம் கொண்டுவரச் செய்யப்பட்டன.

அந்தக் காவல் நிலையத்தில் இருந்த சிசிடிவி காட்சிகளை பதிவிறக்கம் செய்வதற்காக மாவட்ட நீதிமன்றம், மாவட்ட நிர்வாகத்திலிருந்து பணியாளர்கள் வரவழைக்கப்பட்டு ஆய்வுசெய்யப்பட்டது. அப்போது சிசிடிவி காட்சிகளைப் பதிவுசெய்வதற்கு ஹார்ட் டிஸ்க்கில் போதுமான நினைவகம் இருந்தும் தினமும் தானாக அழிந்துபோகும் அளவுக்கு அதன் செட்டிங் மாற்றப்பட்டிருந்தது என நீதித் துறை நடுவரின் அறிக்கை குறிப்பிடுகிறது.

இதற்குப் பிறகு மகாராஜா என்ற காவலரின் வாக்குமூலம் பதிவுசெய்யப்பட்டபோது, அவர் கேள்விப்பட்ட செய்திகளை முறையாக வாக்குமூலமாக அளிக்கவில்லையென்றும் அதற்குப் பிறகு, தலைமைக் காவலரை சாட்சியளிக்க அழைத்தபோது மிகுந்த பயத்துடன், தான் சொல்வதை வெளியில் சொல்ல வேண்டாம் எனக் கேட்டுக்கொண்டதாக நீதித் துறை நடுவர் தன் அறிக்கையில் பதிவுசெய்துள்ளார்.

இந்த நேரத்தில் நீதிமன்ற ஊழியர்கள் பாதுகாப்பிற்காக வெளியில் நிறுத்தப்பட்ட போதிலும், காவலர்கள் நிலையத்திற்கு அருகில் இருந்த வேப்பமரத்தடியில் நின்றபடி நீதிமன்ற ஊழியர்களைக் கிண்டல் செய்ததாகவும் சாட்சியங்களைப் பதிவு செய்வதில் சிரமம் ஏற்படுத்தியதாகவும் நீதித் துறை நடுவர் கூறியிருக்கிறார்.

நீதித்துறை நடுவரிடம் தலைமைக் காவலர் ரேவதி அளித்த வாக்குமூலம், சம்பவ தினத்தன்று நடந்த விவகாரங்களை விரிவாக விவரிக்கிறது.

"கைதிகள் இருவரையும் அங்கிருந்த காவலர்கள் விடிய விடிய லத்தியால் அடித்ததாகவும் அதில் லத்தி மற்றும் டேபிளில் கரை படிந்துள்ளதாகவும் அதனை அவர்கள் அழிக்க நேரிடும் என்றும் உடனடியாக அதனைக் கைப்பற்ற வேண்டுமென்றும் கூறினார். சாட்சி கூறிய லத்திகளைக் கைப்பற்றும் பொருட்டு அங்கிருந்த காவலர்களை லத்தியைக் கொடுக்கும்படி கூறியும் அவர்கள் காதில் ஏதும் விழாததுபோல இருந்தார்கள்.''

''பிறகு கட்டாயப்படுத்தியதன் பேரில் அனைவரும் அவர்களது லத்தியைக் கொடுத்துவிட்டார்கள். அதில் மகராஜன் என்பவர் என்னைப் பார்த்து 'உன்னால் ஒன்றும் ..... முடியாதுடா' என்று என் முதுகுக்குப் பின்னால் என் காதில் விழும்படி பேசி, அங்கு ஒரு அசாதாரண சூழ்நிலையை உருவாக்கினார்" என சாத்தான் குளம் நிலையத்தில் நடந்த சம்பவங்களை நீதித் துறை நடுவர் விவரித்துள்ளார்.

அங்கிருந்த சூழல் சரியில்லாததால் சாட்சியம் அளித்த தலைமைக் காவலர் ரேவதி கையெழுத்திட மறுத்துவிட்டதாகவும் அவரிடம் பாதுகாப்பு குறித்து உறுதியளித்த பின் கையெழுத்துப் பெறப்பட்டதாகவும் நீதித் துறை நடுவர் தெரிவித்துள்ளார்.

நீதித்துறை நடுவரின் இந்த அறிக்கை நீதிமன்றத்தில் சமர்ப்பிக்கப்பட்ட நிலையில், அறிக்கையில் உள்ள சம்பவங்கள் பெரும் பரபரப்பை ஏற்படுத்தியிருக்கின்றன.

சமூக ஊடகங்களில் பிபிசி தமிழ்:

• பிபிசி தமிழ் ஃபேஸ்புக்
• பிபிசி தமிழ் ட்விட்டர்
• பிபிசி தமிழ் இன்ஸ்டாகிராம்
• பிபிசி தமிழ் யு டியூப்

source: bbc.com/tamil

Continue Reading

BREAKING : அமைச்சர் அன்பழகனுக்கு கொரோனா உறுதி

DINASUVADU:உயர்கல்வித்துறை அமைச்சர் கே.பி.அன்பழகனுக்கு கொரோனா தொற்று உறுதி செய்யப்பட்டுள்ளது.

தமிழகம் முழுவதும் கொரோனா வைரஸ் தீவிரமாக பரவி வருகிற நிலையில், இதனை கட்டுப்படுத்த அரசு பல முன்னெச்சரிக்கை நடவடிக்கைகளை மேற்கொண்டு வருகின்றது அரசு.

இதனிடையே உயர்கல்வித்துறை அமைச்சர் கே.பி.அன்பழகனுக்கு கொரோனா பாதிப்பு உறுதியாகி மருத்துவமனையில் அனுமதிக்கப்பட்டுள்ளதாக தகவல் வெளியானது.ஆனால் இதற்கு அமைச்சர் தரப்பில் இருந்து மறுப்பு தெரிவிக்கப்பட்டது.

இந்நிலையில் உயர்கல்வித்துறை அமைச்சர் கே.பி.அன்பழகனுக்கு கொரோனா தொற்று உறுதி செய்யப்பட்டுள்ளது என்று மியாட் மருத்துவமனை அறிக்கை வெளியிட்டுள்ளது. அமைச்சர் அன்பழகனின் உடல்நிலை சீராக உள்ளது.தொடர் கண்காணிப்பில் உள்ளார் என்றும் தெரிவிக்கப்பட்டுள்ளது.

Continue Reading

திருச்சியில் முதியவரைத் தாக்கிய தலைமைக் காவலர் ஆயுதப்படைக்கு மாற்றம்

THE HINDU TAMIL : திருச்சியில் சைக்கிளில் வந்த முதியவரைத் தாக்கிய தலைமைக் காவலரை ஆயுதப்படைக்கு இடமாற்றம் செய்து காவல் ஆணையர் வி.வரதராஜூ உத்தரவிட்டுள்ளார்.

திருச்சி எம்ஜிஆர் சிலை ரவுண்டானா அருகே நேற்று (ஜூன் 29) மதியம் ஒரு இருசக்கர வாகனமும், சைக்கிளும் மோதிக்கொண்டன. அப்போது நடைபெற்ற வாக்குவாதத்தின்போது சைக்கிளில் வந்த முதியவரை, இருசக்கர வாகனத்தில் வந்த சீருடை அணிந்த காவலர் தாக்கிவிட்டுச் செல்லும் வீடியோ காட்சிகள் சமூக வலைதளங்களில் வேகமாகப் பரவியது.

இதையடுத்து முதியவரைத் தாக்கிய காவலர் குறித்து விசாரணை நடத்துமாறு காவல் ஆணையர் வி.வரதராஜூ உத்தரவிட்டார். அதன்பேரில் எம்ஜிஆர் சிலை ரவுண்டானா, ஐயப்பன் கோயில் சாலை ஆகியவற்றில் வைக்கப்பட்டிருந்த சிசிடிவி கேமராக்களில் பதிவான காட்சிகளை காவல் கட்டுப்பாட்டு அறையிலிருந்து போலீஸார் ஆய்வு செய்தனர். அதில் அவர், உறையூர் சட்டம், ஒழுங்கு காவல் நிலையத்தில் தலைமைக் காவலராகப் பணிபுரியும் இளங்கோ என்பது தெரியவந்தது. இதையடுத்து அவரிடம் காவல்துறை உயரதிகாரிகள் விசாரணை நடத்தினர். அப்போது, அந்த முதியவர் தகாத வார்த்தைகள் பேசியதாகவும், அதன் காரணமாக அவரை அடித்ததாகவும் இளங்கோ விளக்கம் அளித்தார்.

எனினும், சீருடை அணிந்துகொண்டு பொது இடத்தில் தகாத முறையில் நடந்து கொண்டதாகக் கூறி இளங்கோவை ஆயுதப்படைக்கு மாற்றம் செய்து காவல் ஆணையர் வி.வரதராஜூ இன்று (ஜூன் 30) உத்தரவிட்டார்.

Continue Reading

#Breaking: பெண்களை ஏமாற்றிய வழக்கில் நாகர்கோவில் காசியின் தந்தை கைது!

DINASUVADU: தமிழகம் முழுவதும் பல பெண்களை சமூக வலைதளம் வாயிலாக ஏமாற்றி, பணமோசடி வழக்கில் நாகர்கோவிலை சேர்ந்த காசி என்கிற இளைஞரை போலீசார் கைது செய்து அவர்மீது வழக்குப்பதிவு செய்து விசாரித்து வருகின்றனர். இவரது வழக்கை சிபிசிஐடிக்கு மாற்ற கோரி கன்னியாகுமரி எஸ்பி பரிந்துரை செய்ததன் பெயரில், இந்த வழக்கு சிபிசிஐடிக்கு மாற்றப்பட்டுள்ளது.

இந்த வழக்கில் சிபிசிஐடி போலீசார் காசியின் நண்பரை கைது செய்தனர். இந்நிலையில், இந்த வழக்கு குறித்த தடயங்களை அழித்ததாக காசியின் தந்தையை சிபிசிஐடி போலிஸார் கைது செய்தனர்.

Continue Reading

நடத்தையில் மேம்பாடு தேவை: திருச்சி சரகத்தில் 80 காவலர்கள் மாற்றம்...டி.ஐ.ஜி அறிவிப்பு!

திருச்சி: திருச்சி சரகத்தில் நடத்தையில் மேம்பாடு தேவைப்படும் 80 காவலர்கள் மக்களின் நேரடி தொடர்பு பணியில் இருந்து மாற்றப்படுவதாக திருச்சி டி.ஐ.ஜி. தெரிவித்துள்ளார். திருச்சி, கரூர் உள்ளிட்ட 5 மாவட்டங்களை சேர்ந்த 80 காவலர்களுக்கு பொதுமக்களுடன் நல்லுறவை கடைபிடிப்பது குறித்த சிறப்பு பயிற்சி அளிக்க காவல்நிலைய பணியில் இருந்து விடுவிக்கப்பட்டுள்ளனர். பொதுமக்களிடையே பெரும் அதிர்வலைகளை ஏற்படுத்தியுள்ள சாத்தான்குளம் சம்பவத்திற்கு நாளுக்கு நாள் கண்டனம் வலுத்து வருகிறது. தமிழகம் முழுவதிலும் போலீசார்...

Continue Reading

தந்தை,மகன் உயிரிழந்த விவகாரம் ! சாத்தான்குளம் காவல் நிலையத்தில் மீண்டும் விசாரணை

தினச்சுவடு:சாத்தான்குளம் தந்தை, மகன் மரணம் தொடர்பாக நீதித்துறை நடுவர் பாரதிதாசன் மீண்டும் விசாரணையை தொடங்கியுள்ளார். சாத்தான்குளத்தில் ஜெயராஜ்-பென்னிக்ஸ் ஆகிய இருவர் சிறையில் இருந்து உயிரிழந்த சம்பவம் பெரும் பரபரப்பை ஏற்படுத்தியுள்ளது.இந்த விவகாரம் தொடர்பாக உயர்நீதிமன்ற மதுரை கிளை தாமாக விசாரணை நடத்தி வருகிறது. நேற்று கோவில்பட்டி கிளை சிறையில் விசாரணை நடத்தினார். நடைபெற்ற விசாரணையின் போது மாஜிஸ்திரேட்டை ஒருமையில் விமர்சித்ததாக தூத்துக்குடி ஏ.எஸ்.பி குமார், டி.எஸ்.பி பிரதாபன்,காவலர் மகாராஜன் மீது நீதிமன்ற அவமதிப்பு வழக்கு பதியப்பட்டது.மேலும் இன்று ஆஜராகவும் உத்தரவு பிறப்பிக்கப்பட்டது.இதனை தொடர்ந்து இன்று ஏ.எஸ்.பி குமார், டி.எஸ்.பி பிரதாபன்,காவலர் மகாராஜன் ஆகியோர் உயர்நீதிமன்ற மதுரை கிளையில் ஆஜராகினர்.அப்பொழுது நீதிமன்றத்தில் விளக்கம் அளிக்கப்பட்டது. மன அழுத்தம் காரணமாக மாஜிஸ்திரேட்டை போலீசார் அவமதிக்கும் விதத்தில் பேசிவிட்டதாக தெரிவிக்கப்பட்டது. 

மேலும் ஏ.எஸ்.பி குமார், டி.எஸ்.பி பிரதாபன்,காவலர் மகாராஜன் ஆகிய மூவரும் 4 வாரத்தில் விளக்கம் அளிக்க உயர்நீதிமன்ற மதுரை கிளை உத்தரவு பிறப்பித்தது. இந்த சமயத்தில் மாஜிஸ்திரேட் பாரதிதாசன் தாக்கல் செய்த அறிக்கையில், சாத்தான்குளம் காவல்நிலையத்தில் பணியாற்றிய நேரடி சாட்சி தலைமைக் காவலர் ரேவதியிடம் விசாரணை நடத்தியபோது, தந்தை - மகன் இருவரும் விடிய விடிய தாக்கப்பட்டதாகவும், இதனால் காவல்நிலையத்தில் உள்ள மேஜை மற்றும் லத்தியில் ரத்தக் கறை ஏற்பட்டதையும் தெரிவித்தார். இந்நிலையில் மாஜிஸ்திரேட் பாரதிதாசன் மீண்டும் சாத்தான்குளம் காவல்நிலையத்தில் தலைமைக் காவலர் ரேவதியிடம் விசாரணை மேற்கொண்டு வருகிறார்.

Continue Reading

உடல் வலிமையைக் காட்டி மிரட்டல்; சிசிடிவி காட்சிகள் அழிப்பு: கோவில்பட்டி நீதித்துறை நடுவர் பரபரப்புத் தகவல்

சாத்தான்குளம் காவல் நிலையத்திற்கு விசாரணைக்குச் சென்றபோது, ஏடிஎஸ்பி உடல் வலிமையைக் காட்டியும், போலீஸார் ஒருமையில் பேசியும், அசாதாரண சூழ்நிலையை உருவாக்கி மிரட்டியதாக உயர் நீதிமன்ற மதுரைக் கிளைக்கு அனுப்பிய அறிக்கையில் கோவில்பட்டி நீதித்துறை நடுவர் தெரிவித்துள்ளார்.

சாத்தான்குளம் சம்பவம் தொடர்பான காவல் நிலையத்துக்கு நேரில் சென்று விசாரிக்க கோவில்பட்டி முதலாவது நீதித்துறை நடுவருக்கு உயர் நீதிமன்ற மதுரைக் கிளை உத்தரவிட்டது. அதன்படி நீதித்துறை நடுவர் எம்.எஸ்.பாரதிதாசன் சாத்தான்குளம் காவல் நிலையத்தில் நேரில் சென்று விசாரித்தார்.

பின்னர் அவர் உயர் நீதிமன்றப் பதிவாளருக்கு அனுப்பியுள்ள அறிக்கையில் கூறியிருப்பதாவது:

''உயர் நீதிமன்ற மதுரைக் கிளை உத்தரவுப்படி சாத்தான்குளம் காவல் நிலையத்துக்கு விசாரணைக்காக ஜூன் 28-ல் நண்பகல் 12.45 மணிக்குச் சென்றேன். கூடுதல் காவல் கண்காணிப்பாளர் டி.குமார், டிஎஸ்பி சி.பிரதாபன் ஆகியோர் ஆய்வாளர் அறையில் இருந்தனர்.

இருவரும் ஒருமுறை கூட முறையாக வணக்கம் செலுத்தாமல் அலட்சிய மனப்பான்மையுடனும், பொறுப்பற்ற தன்மையுடனும் நின்று கொண்டிருந்தனர். டி.குமார் உடல் பலத்தைக் காட்டுவது போன்ற உடல் அசைவுகளைச் செய்தபடி நின்று கொண்டிருந்தார்.

அவரிடம் இந்த வழக்கை உயர் நீதிமன்றம் கண்காணித்து வருகிறது என்று சொன்ன பிறகும் மிரட்டும் தொனியிலான பார்வையுடனும் உடல் அசைவுகளுடன் நின்று கொண்டிருந்தார்.

பொது நாள் குறிப்பேடு மற்றும் இதர பதிவேடுகளைக் கேட்டபோது அவற்றைத் தர நடவடிக்கை எடுக்காமல் டி.குமார் காவலர்களை 'ஏ இத கொண்டு வா, அத கொண்டு வா' என்று அதட்டும் தொனியில் கூறிக்கொண்டு அங்கேயே நின்றிருந்தார். வழக்கின் ஆவணங்களை எழுத்தர் தாமதமாகக் கொண்டு வந்து கொடுத்தார்.

காவல் நிலையக் கண்காணிப்பு கேமராவில் பதிவான காட்சிகளை பதிவிறக்கம் செய்ய முயன்றபோது சிசிடிவியின் ஹார்டு டிஸ்க்கில் பதிவாகும் காட்சிகள் தினமும் தானாகவே அழிந்து போகுமாறு மாற்றம் செய்யப்பட்டிருந்தது. சம்பவ நாளான ஜூன் 19 முதலான எவ்விதக் காணொலிப் பதிவுகளும் கணிணியில் இல்லை. அவை அழிக்கப்பட்ட நிலையில் இருந்தன.

காவலர் மகாராஜானிடம் பல்வேறு கேள்விகள் கேட்கப்பட்டும் அவர் பயத்துடன் சரிவரப் பதில் அளிக்கவில்லை. சம்பவ இடத்தில் சாட்சியாக இருந்த தலைமைக் காவலர் ரேவதியின் சாட்சியம் நிதானமாகப் பதிவு செய்யப்பட்டது. அவர் மிகுந்த பயத்துடனும், தான் சொல்வதை வெளியே சொல்லிவிட வேண்டாம், தான் சாட்சியம் அளிப்பதை வெளியே இருப்பவர்கள் கேட்டுக்கொண்டிருப்பார்கள் என பயத்துடன் தெரிவித்தார்.

பின்னர் நீதிமன்ற ஊழியர்களை அறைக்கு வெளியே பாதுகாப்புக்காக நிறுத்திய போதும், போலீஸார் காவல் நிலையத்தின் வேப்ப மரத்தின் கீழ் அவ்வப்போது கூட்டமாக நின்று கொண்டு சாட்சியத்தைப் பதிவு செய்ய முடியாதவாறு கிண்டல் செய்துகொண்டு சிரமம் ஏற்படுத்தி அசாதாரண சூழ்நிலைகளை ஏற்படுத்தினர்.

ரேவது தனது வாக்குமூலத்தில் கைதிகள் இருவரையும் அங்கிருந்த காவலர்கள் விடிய விடிய லத்தியால் அடித்ததாகவும், இதில் லத்தி மற்றும் டேபிளில் ரத்தக்கறை படிந்துள்ளதாகவும், அவற்றை அழிக்க வாய்ப்பிருப்பதால் அவற்றைக் கைப்பற்ற வேண்டும் என்றும் கூறினார். அந்த லத்தியை எடுக்கும்படி காவலர்களைக் கேட்டபோது அவர்கள் காதில் விழாதது போல் இருந்தனர். கட்டாயப்படுத்தி கேட்டபிறகே லத்தியைக் கொடுத்தனர்.

மகாராஜன் என்பவர் என்னை (நீதித்துறை நடுவர்) பார்த்து என் காதில் விழும்படி, 'உன்னால ஒன்னும் பண்ண முடியாது' என ஒருமையில் தரக்குறைவாகப் பேசி அசாதாரண சூழ்நிலையை உருவாக்கினார்.

அங்கிருந்த காவலர்களில் ஒருவரிடம் லத்தியைக் கேட்டபோது அவர் சுவர் ஏறிக் குதித்து தப்பியோடிவிட்டார். இதை அங்கிருந்த காவலர்கள் வீடியோவில் படம் பிடித்தனர்.

இதனால் சூழல் சரியில்லாத நிலையில் அங்கிருந்து கிளம்ப நேரிட்ட போது சாட்சியத்தில் கையெழுத்திட ரேவதி மறுத்துவிட்டார். பின்னர் அவரது பாதுகாப்பை உறுதி செய்து கையெழுத்து பெறப்பட்டது. அங்கு பாதுகாப்பு இல்லாததாலும், போலீஸார் ஆங்காங்கே சூழ்ந்து கொண்டு நடக்கும் நிகழ்வுகளை செல்போனில் படம் பிடித்து நீதிமன்ற ஊழியர்களை மிரட்டியதாலும் அங்கிருந்து புறப்பட்டு திருச்செந்தூர் அரசினர் விருந்தினர் மாளிகைக்குச் சென்றேன். அங்கிருந்து மாவட்ட நீதிபதியிடம் செல்போனில் தகவல் தெரிவித்தேன்''.

இவ்வாறு நீதித்துறை நடுவர் அறிக்கையில் கூறியுள்ளார்.

இந்த அறிக்கை அடிப்படையிலேயே தூத்துக்குடி ஏடிஎஸ்பி, டிஎஸ்பி, காவலர் மகாராஜன் மீது உயர் நீதிமன்றம் தாமாக முன்வந்து நீதிமன்ற அவமதிப்பு நடவடிக்கை எடுத்துள்ளது.

Continue Reading

ஜெயராஜ்- பெனிக்ஸ் நல்லா இருக்காங்க . மருத்துவ மனையில் இன்ஸ்பெக்டர் ஸ்ரீதர் பச்சை பொய் வீடியோ

tamil .oneindia.com தூத்துக்குடி: சாத்தான்குளத்தைச் சேர்ந்த பென்னிக்ஸ் மற்றும் ஜெயராஜ் ஆகிய இருவரையும் மருத்துவமனையில் சேர்ந்த பிறகு, அவரது நண்பர்களிடம் இருவருக்கும் ஒன்றும் ஆகவில்லை, நான் உத்தரவாதம் கொடுக்கிறேன் என்று பொய் தகவலை சாத்தான்குளம் போலீஸ் இன்ஸ்பெக்டராக இருந்த ஸ்ரீதர் கூறிய வீடியோ தற்போது வைரலாக சுற்றி வருகிறது.

சாத்தான்குளம் அரசரடி தெருவை சேர்ந்தவர் ஜெயராஜ். இவர் அந்த பகுதியில் பனமரக் கடை நடத்தி வந்தார். இவரது மகன் பென்னிக்ஸ். இவர் சாத்தான்குளம் பழைய பேருந்து நிலைய பகுதியில் செல்போன் கடை நடத்தி வந்தார்.

கடந்த 19ஆம் தேதி இரவு நிர்ணயிக்கப்பட்ட நேரத்துக்கு அதிகமாக செல்போன் கடையை திறந்து வைத்ததாக கூறி காவல்துறையினர் வாக்குவாதத்தில் ஈடுபட்டனர். அப்போது அவரது தந்தை தேவராஜும், போலீசாருடன் வாக்குவாதத்தில் ஈடுபட்டதால் இருவரையும் சாத்தான்குளம் காவல் நிலைய போலீசார் கைது செய்து சிறையில் அடைத்தனர்.

 போலீஸ் நிலையத்தில் வைத்து அவர்கள் மிக மோசமான வகையில் தாக்குதலுக்கு உள்ளானதாக தெரிகிறது. இந்த நிலையில் 21ம் தேதி இருவரும் கோவில்பட்டி கிளை சிறைச்சாலையில் அடைக்கப்பட்டனர். அன்றைய தினம் இரவு, பென்னிக்ஸ் நெஞ்சு வலிப்பதாக கூறினார். இதையடுத்து சிறை வார்டன்கள், கண்காணிப்பாளர் ஆகியோர், கோவில்பட்டி மாவட்ட அரசு தலைமை மருத்துவமனையில் அவர்களை சிகிச்சைக்காக சேர்த்தனர்.

அங்கு பரிசோதனை செய்யப்பட்டு மேல் சிகிச்சைக்கு திருநெல்வேலி அரசு மருத்துவமனைக்கு அனுப்ப ஏற்பாடு செய்த நிலையில், பென்னிக்ஸ் பரிதாபமாக உயிரிழந்தார். இன்னொரு பக்கம் உடல்நிலை மோசமாக பாதிக்கப்பட்டிருந்த ஜெயராஜ் கோவில்பட்டி அரசு மருத்துவமனையில் அடுத்த நாள், உயிரிழந்தார்.

ஆனால், முன்னதாக, கோவில்பட்டி மருத்துவமனையில், பென்னிக்ஸ் நண்பர்கள் மற்றும் உறவினர்கள், குழுமியுள்ளனர். என்னானதோ ஏதானதோ என்று பதைபதைப்புடன் இருந்த அவர்கள் முன்னிலையில் வந்த சாத்தான்குளம் இன்ஸ்பெக்டர் ஸ்ரீதர், நீங்கள் நினைப்பது போல அவர்களுக்கு எந்த பிரச்சனையும் இல்லை. நலமாக இருக்கிறார்கள். இதற்கு நான் உத்தரவாதம். தயவு செய்து நாளை காலை வாருங்கள். பேசிக்கொள்வோம் என்று தெரிவித்துள்ளார்.

ஆனால் பென்னிக்ஸ் அன்றைய தினமும், ஜெயராஜ் மறுதினமும் அடுத்தடுத்து உயிரிழந்துள்ளனர். இருவரது பின் பக்கத்திலும் கடுமையான தாக்குதல் நடந்து ரத்தம் வடிந்துள்ளதாக சில ஊடகங்களில் செய்தி வெளியாகியுள்ளது. அவ்வளவு சீரியஸ் நிலையில் இருந்தபோதும், காவல்துறை ஆய்வாளராக இருந்த ஸ்ரீதர் இவ்வாறு பொய் தகவலை கூறியுள்ளார். இவர் தற்போது காத்திருப்போர் பட்டியலில் வைக்கப்பட்டுள்ளார் என்பது குறிப்பிடத்தக்கது.

Continue Reading

போலீஸ் சித்ரவதையைத் தண்டனைக்குரிய குற்றமாக்க வேண்டும்

போலீஸ் சித்ரவதையைத் தண்டனைக்குரிய குற்றமாக்க வேண்டும்: அரசுக்கு அழுத்தம் அளிக்கக் கோரிக்கை

தி இந்து தமிழ்:போலீஸ் சித்ரவதையைத் தண்டனைக்குரிய தனிக் குற்றமாக அறிவிக்க மத்திய அரசுக்கு அனைத்து அரசியல் கட்சிகளும் அழுத்தம் கொடுக்க வேண்டும் என சமம் குடிமக்கள் இயக்கம் கோரிக்கை வைத்துள்ளது.

சமம் குடிமக்கள் இயக்கத்தின் மாநிலத் தலைவர் வழக்கறிஞர் சி.சே.ராசன், 'இந்து தமிழ் திசை' இணையதளத்திடம் கூறியதாவது:

''சாத்தான்குளத்தில் வியாபாரிகள் பென்னிக்ஸ், அவரது தந்தை ஜெயராஜ் இருவரையும் போலீஸார் கொடூரமாகத் தாக்கி உயிரிழப்பை ஏற்படுத்தியுள்ளனர். கோவில்பட்டி எட்டயபுரம் மேலத்தெருவைச் சேர்ந்த கட்டிடத் தொழிலாளி கணேசமூர்த்தி காவல்துறையின் சித்ரவதை தாங்க முடியாமல் தற்கொலை செய்து கொண்டுள்ளார்.

கரோனா ஊரடங்கை போலீஸார் தவறுதலாகப் பயன்படுத்தி வருகின்றனர். இதனால் காவல்நிலையங்களில் சித்ரவதைகளும், உயிரிழப்புகளும் அதிகரித்து வருகின்றன. இதற்கு காவல்துறையை நிர்வகித்து வரும் தமிழக முதல்வர்தான் பொறுப்பேற்க வேண்டும். இந்தச் சம்பவத்தில் தொடர்புடைய காவல் அதிகாரிகள் மற்றும் இதர நபர்கள் மீது கொலை வழக்குப் பதிவு செய்து கைது செய்ய வேண்டும். வழக்கை சிபிஐ விசாரணைக்கு மாற்ற வேண்டும்.

சித்ரவதைக்கு எதிரான ஐக்கிய நாடுகள் சபையின் பிரகடனத்தில் 1997-ல் இந்திய அரசு கையெழுத்திட்டுள்ளது. இருப்பினும் அந்தப் பிரகடனம் இன்னும் அமல்படுத்தப்படவில்லை. எனவே சித்ரவதைக்கு எதிரான நிலைப்பாட்டை எடுத்து, சித்ரவதையை தண்டனைக்குரிய தனிக்குற்றமாக அறிவித்து காவல்துறை சித்ரவதைக்கு முடிவுகட்ட மத்திய அரசுக்கு அனைத்துக் கட்சிகளும் அழுத்தம் கொடுக்க வேண்டும்''.

இவ்வாறு வழக்கறிஞர் சி.சே.ராசன் தெரிவித்தார்.

Source : www.hindutamil.in

Continue Reading

நடிகை வனிதாவின் 3-வது கணவர் பீட்டர் பால் மீது காவல்நிலையத்தில் புகார்

நடிகை வனிதாவின் 3-வது கணவர் பீட்டர் பால் மீது அவரது மனைவி வடபழனி காவல்நிலையத்தில் புகார்

சென்னை: நடிகை வனிதாவின் 3-வது கணவர் பீட்டர் பால் மீது அவரது மனைவி வடபழனி காவல்நிலையத்தில் புகார் அளித்துள்ளார். வனிதாவுக்கு பீட்டர் பாலுக்கும் நேற்று திருமணம் நடந்த நிலையில் 7 ஆண்டுகளாக பிரிந்து வாழும் நிலையில் விவாகரத்து செய்யாமலே வனிதாவை திருமணம் செய்ததாக எலிசபெத் ஹெலன் போலீசில் புகார் அளித்துள்ளார்.

Continue Reading

ஊழல் டெண்டர் ரத்து: உதயகுமார் பதவிக்கு ஆபத்து?

ஊழல் டெண்டர் ரத்து: உதயகுமார் பதவிக்கு ஆபத்து?

?மின்னம்பலம  :  தமிழக தகவல் தொழில்நுட்பத் துறை சார்பாக பாரத் நெட் என்ற திட்டத்தின் கீழ் கிராமப் புறங்களை இணைய வழி இணைக்கும் திட்டத்துக்கான டெண்டர் விடப்பட்டது. 1950 கோடி ரூபாய் மதிப்புள்ள இந்த டெண்டரில் முறைகேடுகள் நடந்திருப்பதாகவும், எனவே இந்த டெண்டரை ரத்து செய்ய வேண்டுமென்றும் முதன் முதலில் அறப்போர் இயக்கம் வெளிக் கொணர்ந்தது. இந்த அறப்போரின் முடிவாக ஒன்றிய வர்த்தக, தொழில் துறை அமைச்சகம் தமிழ்நாடு அரசின் 1950 கோடி ரூபாய் டெண்டரை ரத்து செய்து உத்தரவிட்டிருக்கிறது.

பைபர் ஆப்டிக் கேபிள் பாரத்நெட் டெண்டர் நிபந்தனைகள் பாரபட்சமானதாகவும் போட்டியை குறைக்கும் வண்ணம் இருப்பதாகவும் கண்டுபிடிக்கப்பட்டுள்ளதாக ஒன்றிய அரசின் ஆணை தெரிவித்துள்ளது.

சந்தோஷ்பாபு வகுத்த டெண்டர்

ஒன்றிய அரசின் நிதியுதவியோடு தமிழகத்திலுள்ள அனைத்து கிராமப் பஞ்சாயத்துகளுக்கும் ஃபைபர் ஆப்டிகல் கேபிள் மூலம் இணைய இணைப்பைக் கொண்டு சேர்க்கும் திட்டம்தான் பாரத் நெட். கடந்த ஆண்டு தகவல் தொழில் நுட்பத் துறை செயலாளராக இருந்த சந்தோஷ் பாபு ஐ.ஏ.எஸ்.தான் இந்தத் திட்டத்துக்கான டெண்டர் நிபந்தனைகளை பல மாதங்கள் உழைத்து உருவாக்கினார்.

இதன் பிறகு இந்த டெண்டருக்கான ஒப்புதல் முதல்வர் அலுவலகத்தால் பெறப்பட்டது. 2019 டிசம்பர் 5, 6 தேதிகளில் பேக்கேஜ் ஏ, பேக்கேஜ் பி, பேக்கேஜ் சி, பேக்கேஜ் டி என 1950 கோடி ரூபாய் மதிப்புள்ள நான்கு டெண்டர்களாக வெளியிடப்பட்டன.

நிபந்தனைகளை மாற்ற அழுத்தம்

சந்தோஷ்பாபு ஐ.ஏ.எஸ். வடிவமைத்த நிபந்தனைகள் தகுதியுள்ள பல நிறுவனங்கள் போட்டியிடும் அளவுக்கு அமைக்கப்பட்டன. ஆனால் அதன் பின் ஜனவரி மாதம் இந்த டெண்டர் விதிமுறைகளில் சில மாற்றங்களை செய்யச் சொல்லி சந்தோஷ்பாபு ஐ.ஏ.எஸ்.சுக்கு அழுத்தம் தரப்பட்டது. அதாவது ஒரு சில தகுதியற்ற நிறுவனங்கள் கூட இந்த டெண்டரில் பங்கேற்று டெண்டர் பெற்றுவிடும் அளவுக்கு நிபந்தனைகளை நீர்த்துப் போகச் செய்ய அரசுக்குள் இருந்தே ஏற்பாடுகள் நடந்தன. ஆனால் சந்தோஷ்பாபு இதைச் செய்ய மறுத்தார். நிபந்தனைகளை தளர்த்தினால் டெண்டருக்கே அர்த்தமில்லாமல் போய்விடும் என்று வாதாடினார். முதல்வரை கூட இது விஷயமாக அவர் சந்தித்தார் என்று அப்போது கோட்டை வட்டாரத்தில் கூறினார்கள்.

மறுத்ததால் மாற்றப்பட்ட சந்தோஷ்பாபு

ஆனாலும் செருப்புகேற்ப காலை வெட்ட மறுத்த சந்தோஷ்பாபு ஐ.ஏ.எஸ். அந்தத் துறையில் இருந்து மாற்றப்பட்டு கைத்தொழில் துறைக்கு அனுப்பப்பட்டார். சந்தோஷ்பாபுவுக்கு பதிலாக ஹன்ஸ்ராஜ் வர்மாவுக்கு தகவல் தொழில் நுட்பத்துறை கூடுதல் பொறுப்பாக வழங்கப்பட்டது. மேலும் டெண்டரை வெளியிட்ட தகவல் தொழில் நுட்பத் துறைக்கு உட்பட்ட TANFINET இயக்குனராக இருந்த சண்முகம் மாற்றப்பட்டு ரவிச்சந்திரன் அந்த இடத்துக்கு நியமிக்கப்பட்டார். இந்த மாற்றத்தை எதிர்த்து அறப்போர் இயக்கம் தலைமைச் செயலாளருக்கு 2020 ஜனவரி 28 ஆம் தேதி மனு அனுப்பியது. கண்காணிப்பு இயக்கங்களும், ஊடகங்களும் கண்கொத்திப் பாம்பாக கூர்மையாக கவனம் செலுத்தியதால், அப்படியே இதை ஆறப்போட்டனர்.

கொரோனா ஊரடங்கில் மாறிய நிபந்தனைகள்

இந்நிலையில்தான் கொரோனா ஊரடங்கு உச்சத்தில் இருந்த ஏப்ரல் 15 ஆம் தேதி சந்தோஷ்பாபு ஐ. ஏ.எஸ். செய்ய மறுத்த மாற்றங்களைக் கொண்டு வந்து புதிய டெண்டர் நிபந்தனைகளை வெளியிட்டது தகவல் தொழில் நுட்பத்துறை. டெண்டரின் முக்கிய நிபந்தனைகள் பெரிய அளவில் மாற்றப்பட்டு வெளியிடப்பட்டது. நிறுவனங்களுக்கான டேர்ன் ஓவர், அனுபவம் என பல பிரிவுகள் மாற்றப்பட்டு அதன் மூலம் தகுதி வாய்ந்த நிறுவனங்களை வெளியே தள்ளி, வேண்டப்பட்ட நிறுவனங்களுடன் வெற்றிலை பாக்கு மாற்றத்தான் இந்த மாற்றங்கள் கொரோனா காலத்தில் கொண்டு வரப்பட்டன.

அறப்போர் புகாரில் உண்மை

இதை எதிர்த்து அறப்போர் இயக்கம் மத்திய அரசின் விஜிலென்ஸ் கமிஷன், தொலைத் தொடர்புத் துறை அமைச்சகம், தமிழக முதல்வர், தலைமைச் செயலாளர் என பலருக்கும் புகார் அனுப்பியது. உதயகுமார் இதற்கு பதிலளிக்கையில், ‘பாரத் நெட் திட்டமானது ஒன்பது மாத காலத்துக்குள் முடிக்கப்பட வேண்டும். அந்த அவசரத்தால் டெண்டர் நிபந்தனைகளில் மாற்றம் செய்திருக்கிறோம்.” என்று கூறினார். இந்த நிலையில்தான அறப்போர் இயக்கத்தின் புகாரை ஏற்று மத்திய தொழில் வர்த்தகத் துறை அமைச்சகம் இந்த 1950 கோடி ரூபாய் டெண்டர் பாரபட்சமான நிபந்தனைகளைக் கொண்டிருக்கிறது என்பதால் அதை ரத்து செய்ய வேண்டும் என்று உத்தரவிட்டிருக்கிறது. மத்திய தொழில் வர்த்தகத்துறை அமைச்சகத்தின் கீழ் இயங்கும் உள்நாட்டு வர்த்தகம், தொழில் மேம்பாட்டுத் துறை (The Department for Promotion of Industry and Internal Trade) ஜூன் 23 ஆம் தேதி நடத்திய அவசர காணொலி ஆலோசனைக்குப் பின் இந்த முடிவெடுக்கப்பட்டிருக்கிறது.

தமிழக தலைமைச் செயலாளருக்கு ஜூன் 26 அன்று அனுப்பப்பட்ட கடிதத்தில், தமிழ்நாடு அரசின் ஏல நிபந்தனைகள் கட்டுப்படுத்தப்பட்ட மற்றும் பாரபட்சமானவை என்று சுட்டிக்காட்டியதுடன், புதிய டெண்டர்கள் வெளியிடப்பட வேண்டும் என்றும் கூறப்பட்டுள்ளது. இந்த டெண்டரை உடனடியாக ரத்து செய்வது தொடர்பாக சரியான நடவடிக்கை எடுக்குமாறு தொலைத் தொடர்புத் துறை அமைச்சகம் கண்காணித்து வழி நடத்த வேண்டும், இது தொடர்பாக எடுக்கப்பட்ட நடவடிக்கை குறித்து அவசர அறிக்கையை அனுப்ப வேண்டும் என்று ஒன்றிய அமைச்சகம் உத்தரவிட்டுள்ளது.

புது டெண்டர்- உதயகுமார்

இது தொடர்பாக தகவல் தொழில் நுட்பத்துறை அமைச்சர் ஆர்.பி. உதயகுமாரிடம் தி இந்து ஆங்கில நாளேட்டின் சார்பில் தொடர்புகொண்டு கேட்கப்பட்டபோது, “இந்திய அரசின் வழிகாட்டுதல்களுக்கு இணங்க புதிய டெண்டரை மாநில அரசு விரைவில் வெளியிடும்” என்று அவர் தெரிவித்திருக்கிறார். மேலும், “பாரத் நெட் டெண்டர் என்பது மத்திய அரசு நிதியளிக்கும் திட்டம் மற்றும் மாநிலம் முழுவதும் உள்ள 12,542 கிராமங்களுக்கு அதிவேக இணைய இணைப்பை எடுத்துச் செல்வதற்கான தமிழக முதல்வர் எடப்பாடி கே.பழனிசாமியின் லட்சிய திட்டம்.

திட்டத்தில் 100 சதவீத வெளிப்படைத்தன்மை உள்ளது. இதில் மறைக்கப்பட்ட நிகழ்ச்சி நிரல் இல்லை. சிலர் அரசாங்கத்தின் மீது ஊழல் குற்றச்சாட்டுகளை சுமத்தி நீதிமன்றத்தை நகர்த்தியபோது, ​​இரு தரப்பினரையும் ஆராய்ந்த பின்னர், அத்தகைய குற்றச்சாட்டை உறுதிப்படுத்த எந்தவொரு பொருளும் இல்லை என்று நீதிமன்றம் கூறியது. இந்நிலையில் ஒன்றிய அரசு சில வழிகாட்டுதல்களை வழங்கியுள்ளது. மறு டெண்டருக்கு அறிவுறுத்தியுள்ளது. நாங்கள் ஒரு கூட்டத்தை கூட்டி மறு டெண்டர் வழங்குவோம்” என சொல்லியிருக்கிறார் அமைச்சர் உதயகுமார்.

உதயகுமார் பதவி விலக வேண்டும்

ஆனால் அறப்போர் இயக்கமோ “இதன் மூலம் அறப்போர் இயக்கத்தின் புகார் உண்மை என்பதும் அமைச்சர் உதயகுமார் மீண்டும் மீண்டும் இதை மூடி மறைக்க முயன்றார் என்பதும் ஊர்ஜிதமாகிறது. துறை அமைச்சர் உதயகுமார் உடனடியாக பதவி விலக வேண்டும். இல்லையேல் முதலமைச்சர் உடனடியாக அமைச்சர் உதயகுமாரை பதவி விலக்க வேண்டும். துறைச் செயலாளரான ஹன்ஸ் ராஜ் வர்மா, TANFINET இயக்குனர் ரவிச்சந்திரன் மற்றும் சம்பந்தப்பட்ட அதிகாரிகள் இடைநீக்கம் செய்யப்பட்டு துறை ரீதியான நடவடிக்கை மற்றும் குற்ற வழக்கு பதிவு செய்யப்பட வேண்டும். புதிய டெண்டர் போடும் பட்சத்தில் பாரபட்சமின்றி போட்டியை குறைக்கா வண்ணம் சந்தோஷ்பாபு ஐ.ஏ,.எஸ். வடிவமைத்தபடி டிசம்பர் 2019 வெளியிட்ட விதிகளுடன் வேண்டும்.

காலையில் இருந்து அமைச்சர் உதயகுமார் அனைத்து பேட்டிகளிலும் டெண்டர்களை ரத்து செய்யவில்லை என்று சொல்லி வருகிறார். மேலும் நீதிமன்றம் உங்கள் செட்டிங் டெண்டருக்கு ஆதரவாக எந்த உத்தரவும் பிறப்பிக்கவில்லை. பொய் சொல்லி நீதிமன்ற அவமதிப்பு வழக்கில் சிக்கி கொள்ளவேண்டாம்” என்கிறார்கள் அறப்போர் இயக்க நிர்வாகிகள்.

-வேந்தன்

Continue Reading